Як я была малалеткай

“як я была малалеткай” – аўтафікшн, які зрабіўся падзеяй для сучаснай літоўскай літаратуры. Гэта дзёрзкі і непрыхарошаны аповед пра сталенне дзяўчыны, якая шукае сябе ў постсавецкай краіне крывых люстэркаў. Савецкае дзяцінства, юнацтва ў апошняе дзесяцігоддзе XX ст. у Вільні, жыццё за мяжой, дактарантура, каханні, сэкс, вандроўкі, тусоўкі, няўдалыя спробы пісаць. Ці можа быць, што ніводная з існуючых “жаночых” роляў, ніводная ідэнтычнасць не падыходзіць, спаўзае, як кепскія калготкі?

"Кніга Віргініі Кульвінскайтэ “як я была малалеткай” – падзея, можа, нават які-ніякі пералом, а для традыцыйнай прозы – амаль катастрофа. Дасціпна, добры гумар, лаканічныя, не перагружаныя сказы; аўтабіяграфія рэканструяваная ў фікшн.

Распавядаецца без слёз, без сопляў, з камічнымі дэталямі – не адхіляючыся ў самашкадаванне і сентыментальнасць. Кніга напісаная слэнгам, якога ўсё яшчэ баяцца больш кансерватыўныя пісьменнікі, – хіпстарскай англійска-рускай напаўмовай. Чытаеш і, здаецца, чуеш віленскі акцэнт."

/Гедрэ Казлаўскайтэ – паэтэса, празаік, літаратурны крытык

"У тэксце апісваюцца рэальныя месцы Вільні і яе грамадства, але яны праходзяць працэс трансфармацыі з цягам часу, ад дзяцінства апавядальніцы ў 1980-я, калі Літва яшчэ была акупаваная Саветамі, да нашых дзён, калі апавядальніца ўжо дарослая жанчына.

Гэтая кніга, канешне, падзейнічае на нервы тым, хто імкнецца да выразных межаў, сацыяльных нормаў і традыцыйна акрэсленай ідэнтычнасці.

Апавядальніца бісэксуальная, яе стасункі з літаратурай (асабліва тэма яе філалагічнай дысертацыі) нават блізка не нагадваюць нейкі від натхнёнасці альбо духоўнай матэрыі, і ў канцы яна застаецца амаль дарослай – яна не робіць ніякіх высноў, не нараджае ніякіх дзяцей, не знаходзіць мужа."

/Эльжбета Банітэ – літаратурны крытык

Віргінія Кульвінскайтэ — пісьменніца, літаратурны крытык. Дэбютавала зборнікам паэзіі «Двайнік» (2017, Naujas vardas). Раман «як я была малалеткай» (2019, Kitos knygos) — другая кніга пісьменніцы. Таксама выдала зборнік апавяданняў «Чатыры» (2023, Kitos knygos).

Кніга «як я была малалеткай» уключаная ў «Топ-12 самых крэатыўных кніг Літвы» і ў «Топ-5 кніг прозы для дарослых» у 2019 г., прадстаўленая на літоўскіх і міжнародных кніжных выставах і літаратурных фестывалях.

Format/pages: paperback / 191 pages